မိူဝ်ႈဢွၵ်ႇၶၢဝ်းတၢင်း ဢမ်ႇၼၼ် မိူဝ်ႈယူႇၼႂ်းပိုၼ်ႉတီႈဢၼ်ဢမ်ႇမီးလွင်ႈႁူမ်ႇလူမ်ႈ မိူၼ်ၼင်ႇပၢင်တိုၵ်း လႄႈ ပၢင်ၼႄၵၢင်ၸႂ်ၼၼ်ႉ ၽူႈႁဵတ်းၵၢၼ်တႃႇတူင်ႇဝူင်းၸၢင်ႈထုၵ်ႇၸႅတ်ႈထၢမ် ၸဵမ်တူဝ်ၵူၼ်းလႄႈၶိူင်ႈမိုဝ်းၶိူင်ႈၸၢၵ်ႈဢၼ်ပႃးၵႂႃႇၼၼ်ႉယူႇ။ ၵွပ်ႈၼၼ် ၵွၼ်ႇဢွၵ်ႇၶၢဝ်းတၢင်း ဢမ်ႇၼၼ် မိူဝ်ႈတေလူင်းပိုၼ်ႉတီႈၼၼ်ႉ ထုၵ်ႇလီတင်ႈၶေႃႈထၢမ် –
1. လၢင်ႉၶိူင်ႈၸၢၵ်ႈၵွၼ်ႇဢွၵ်ႇတၢင်း
လွၵ်းလၢႆးဢၼ်ႁဵတ်းငၢႆႈ လႄႈ လီသုတ်းတႃႇႁေႉၵင်ႈၼိုင်ႇႁိုဝ် ဢမ်ႇႁႂ်ႈၶေႃႈမုၼ်းလမ်ႇလွင်ႈမီးၼႂ်းၶိူင်ႈၸၢၵ်ႈမိူၼ်ၼင်ႇ ၶွမ်း၊ ၾူၼ်း၊ လႄႈ USB ၼၼ်ႉ ပဵၼ်ၵၢၼ်လၢင်ႉ (Format) ၶေႃႈမုၼ်းၼၼ်ႉယဝ်ႉ။
ၸွင်ႇႁူႉ?
ၶေႃႈမုၼ်းဢၼ်သႂ်ႇၶဝ်ႈၵႂႃၼႂ်းၶွမ်း၊ ၾူၼ်း၊ Disk ၊ USB လႄႈ Memory Card ၼၼ်ႉ ပေႉသမ်ႉဝႃႈယႃႉပႅတ်ႈယဝ်ႉၵေႃႈ မၼ်းတိုၵ်ႉတေသိုပ်ႇမီးၼႂ်းၶိူင်ႈၸၢၵ်ႈၸိူဝ်းၼၼ်ႉယူႇ ဢမ်ႇႁၢႆၵႂႃႇလႂ်။
2. ဢဝ်ဢွၵ်ႇၶေႃႈမုၼ်းၼိူဝ် Desktop ဢမ်ႇၼၼ် Homescreen
ၵူၼ်းၸႂ်ႉၶွမ်းတၢင်းၼမ် ဢဝ်ၶေႃႈမုၼ်းမိူၼ်ၼင်ႇၽိုၼ်လၢႆးငၢၼ်း လႄႈ သဵၼ်ႈမၢႆၸၺၢင်းဝႆႉၼိူဝ် Desktop။ ၸိူဝ်းၸႂ်ႉၾူၼ်းသမ်ႉ ဢဝ်ဢႅပ်ႉ (app) ၵၢၼ်မိူၼ်ၼင်ႇ Facebook၊ Signal၊ လႄႈ Line ဝႆႉၼိူဝ် homescreen (ၼႃႈၾူၼ်း)။ သင်ပိုတ်ႇၶိူင်ႈၸၢၵ်ႈမႃးသေ ထူပ်းႁၼ်ၶေႃႈမုၼ်းၵၢၼ်ငၢၼ်းႁဝ်းလႆႈငၢႆႈငၢႆႈၼႆ ပိူၼ်ႈၸၢင်ႈႁူႉဝႃႈႁဝ်းပဵၼ်ၽႂ်၊ ႁဵတ်းၵၢၼ်သင် လႄႈ ၸၢင်ႈမီးၽေးတေႃႇတူဝ်ၵဝ်ႇ၊ ၵွပ်ႈၼၼ် ၼႃႈ desktop ၼႂ်းၶွမ်း ဢမ်ႇၼၼ် homescreen ၼႂ်ၾူၼ်း ဢမ်ႇထုၵ်ႇလီမီးၶေႃႈမုၼ်းလမ်ႇလွင်ႈၼႆယဝ်ႉ။
3. ထတ်းၶေႃႈမုၼ်းဢၼ်ယၢမ်ႈဢဝ်ဢွၵ်ႇယဝ်ႉ
မိူဝ်ႈႁဝ်းဢဝ်ဢွၵ်ႇ(delete) ၶေႃႈမုၼ်း ၼႂ်းၶွမ်းလႄႈၾူၼ်းၼၼ်ႉ ၵမ်ႈၼမ်ၶေႃႈမုၼ်းတေဢမ်ႇႁၢႆလၢႆၵႂႃႇၵမ်းလဵဝ် ယွၼ်ႉပိူဝ်ႈဝႃႈမၼ်းထုၵ်ႇၶၢႆႉၵႂႃႇဝႆႉၼႂ်းပုၵ်းယုၵ်းယၵ်း (trash) ပုၼ်ႈတႃႇၶိုၼ်းၵူႈ ဢမ်ႇၼၼ် ဢဝ်ၶေႃႈမုၼ်းမႃးၶိုၼ်း။ ၵွပ်ႈၼၼ် ဢွၼ်တၢင်းတေဢွၵ်ႇၶၢဝ်းတၢင်းၼၼ်ႉ ထုၵ်ႇလီထတ်းတူၺ်းထႅင်ႈၵမ်းၼိုင်ႈဝႃႈၶေႃႈမုၼ်းဢၼ်ယၢမ်ႈဢဝ်ဢွၵ်ႇၼၼ်ႉ ၸွင်ႇတိုၵ်ႉမီးယူႇၼႂ်းၶိူင်ႈၸၢၵ်ႈ။
- Windows
ၼိူဝ် Desktop →
တဵၵ်းၶႂႃၼိူဝ် ပုင်းယုၵ်းယၵ်း (Recycle Bin) →
တဵၵ်း Empty Recycle Bin →
တဵၵ်း Yes
- MacOS
ၼိူဝ် Desktop →
တဵၵ်းၶႂႃၼိူဝ် ပုင်းယုၵ်းယၵ်း (Trash) →
တဵၵ်း Empty Trash →
တဵၵ်း Empty Trash ထႅင်ႈၵမ်းၼိုင်ႈ
- Android (ဢဝ်ဢွၵ်ႇၶႅပ်းႁၢင်ႈ)
ၵႂႃႇတီႈ Files (ဢမ်ႇၼၼ် My Files) →
တဵၵ်းတီႈ Trash →
ဢဝ်ဢွၵ်ႇၶေႃႈမုၼ်းဢၼ်ၵိုတ်းလိူဝ်ဝႆႉ
- iOS (ဢဝ်ၶွၵ်ႇၶေႃႈမုၼ်း)
ၵႂႃႇတီႈ Files →
တဵၵ်းတီႈ Recently Deleted →
ဢဝ်ဢွၵ်ႇၶေႃႈမုၼ်းဢၼ်ၵိုတ်းလိူဝ်ဝႆႉ
- Android (ဢဝ်ဢွၵ်ႇၶႅပ်းႁၢင်ႈ)
ၵႂႃႇတီႈၶႅပ်းႁၢင်ႈ Photos ဢမ်ႇၼၼ် Gallery →
ၵႂႃႇတီႈ Settings ☰ →
တဵၵ်းတီႈပုင်းယုၵ်းယၵ်း ဢမ်ႇၼၼ် Trash →
ဢဝ်ဢွၵ်ႇၶႅပ်းႁၢင်ႈ ဢၼ်မီးၼႂ်းပုင်းယုၵ်းယၵ်းထႅင်ႈၵမ်းၼိုင်ႈ
- iOS
ၵႂႃႇတီႈၶႅပ်းႁၢင်ႈ Photos →
ၵႂႃႇတီႈ Albums →
တဵၵ်းတီႈ Recently Deleted →
ဢဝ်ဢွၵ်ႇၶႅပ်းႁၢင်ႈ ဢၼ်မီးၼႂ်းပုင်းယုၵ်းယၵ်းထႅင်ႈၵမ်းၼိုင်ႈ